ek thakan quwwat-e-izhaar mein aa jati hai

ik thakan quvvat-e-iz.hār meñ aa jaatī hai

vaqt ke saath kamī pyaar meñ aa jaatī hai

bas kahīñ chhor samundar kā nazar aa jaa.e

koī tāqat mirī patvār meñ aa jaatī hai

vo guzartā hai to khulte haiñ darīche ghar ke

ik chamak sī dar-o-dīvār meñ aa jaatī hai

TuuTe ghuñghrū kī jo āvāz huā kartī hai

vo khanak kyuuñ mirī guftār meñ aa jaatī hai

jab bhī aatā hai mirā naam tire hoñToñ par

ḳhushbū-e-gul mire ash.ār meñ aa jaatī hai

har ghaḌī apnī tamannāoñ se laḌte laḌte

ik chamak chehra-e-ḳhuddār meñ aa jaatī hai

jab ġhazal 'mīr' kī paḌhtā hai paḌosī merā

ik namī sī mirī dīvār meñ aa jaatī hai

ek thakan quwwat-e-izhaar mein aa jati hai

waqt ke sath kami pyar mein aa jati hai

bas kahin chhor samundar ka nazar aa jae

koi taqat meri patwar mein aa jati hai

wo guzarta hai to khulte hain dariche ghar ke

ek chamak si dar-o-diwar mein aa jati hai

TuTe ghunghru ki jo aawaz hua karti hai

wo khanak kyun meri guftar mein aa jati hai

jab bhi aata hai mera nam tere honTon par

KHushbu-e-gul mere ashaar mein aa jati hai

har ghaDi apni tamannaon se laDte laDte

ek chamak chehra-e-KHuddar mein aa jati hai

jab ghazal 'mir' ki paDhta hai paDosi mera

ek nami si meri diwar mein aa jati hai