ek KHwab ka KHayal hai duniya kahen jise

ik ḳhvāb kā ḳhayāl hai duniyā kaheñ jise

hai is meñ ik tilism tamannā kaheñ jise

ik shakl hai tafannun-e-tab'-e-jamāl kī

is se ziyāda kuchh nahīñ duniyā kaheñ jise

ḳhamyāza hai karishma-parasti-e-dahr kā

ahl-e-zamāna ālam-e-uqbā kaheñ jise

ik ashk ārmīda-e-zabt-e-ġham-e-firāq

mauj-e-havā-e-shauq hai dariyā kaheñ jise

bā-vasf-e-zabt-e-rāz mohabbat hai āshkār

uqda hai dil kā aqd-e-surayyā kaheñ jise

barham-zan-e-hijāb hai ḳhud-raftagī-e-husn

ik shān-e-be-ḳhudī hai zuleḳhā kaheñ jise

aks-e-safā-e-qalb kā jauhar hai ā.īna

vārafta-e-jamāl ḳhud-ārā kaheñ jise

ram-sheva hai sanam to hai ram-āshnā ye dil

hāsil hai mujh ko aish muhayyā kaheñ jise

ḳhūnī kafan ye saiñt ke rakkhā hai kis liye

qātil vo hai ki rashk-e-masīhā kaheñ jise

sab kuchh hai aur kuchh bhī nahīñ dahr kā vajūd

'kaifī' ye baat vo hai muammā kaheñ jise

ek KHwab ka KHayal hai duniya kahen jise

hai is mein ek tilism tamanna kahen jise

ek shakl hai tafannun-e-tab'-e-jamal ki

is se ziyaada kuchh nahin duniya kahen jise

KHamyaza hai karishma-parasti-e-dahr ka

ahl-e-zamana aalam-e-uqba kahen jise

ek ashk aarmida-e-zabt-e-gham-e-firaq

mauj-e-hawa-e-shauq hai dariya kahen jise

ba-wasf-e-zabt-e-raaz mohabbat hai aashkar

uqda hai dil ka aqd-e-surayya kahen jise

barham-zan-e-hijab hai KHud-raftagi-e-husn

ek shan-e-be-KHudi hai zuleKHa kahen jise

aks-e-safa-e-qalb ka jauhar hai aaina

warafta-e-jamal KHud-ara kahen jise

ram-shewa hai sanam to hai ram-ashna ye dil

hasil hai mujh ko aish muhayya kahen jise

KHuni kafan ye saint ke rakkha hai kis liye

qatil wo hai ki rashk-e-masiha kahen jise

sab kuchh hai aur kuchh bhi nahin dahr ka wajud

'kaifi' ye baat wo hai muamma kahen jise