ek jadugar hai aankhon ki basti mein

ik jādūgar hai āñkhoñ kī bastī meñ

taare Taañk rahā hai merī chunarī meñ

mere saḳhī ne ḳhālī haath na lauTāyā

Dheroñ dukh bāñdhe haiñ merī gaThḌī meñ

kaun badan se aage dekhe aurat ko

sab kī āñkheñ girvī haiñ is nagrī meñ

jin kī ḳhushbū chhed rahī hai āñchal ko

kaise phuul vo Daal gayā hai jholī meñ

jis ne mehr-o-māh ke khāte likhne hoñ

maiñ ik zarra kab tak us kī gintī meñ

ishq hisāb chukānā chāhā thā ham ne

saarī umr samā ga.ī ek kaTautī meñ

harf-e-zīst ko maut kī dīmak chaaT bhī le

kab se huuñ mahsūr badan kī ghāTī meñ

ek jadugar hai aankhon ki basti mein

tare Tank raha hai meri chunari mein

mere saKHi ne KHali hath na lauTaya

Dheron dukh bandhe hain meri gaThDi mein

kaun badan se aage dekhe aurat ko

sab ki aankhen girwi hain is nagri mein

jin ki KHushbu chhed rahi hai aanchal ko

kaise phul wo Dal gaya hai jholi mein

jis ne mehr-o-mah ke khate likhne hon

main ek zarra kab tak us ki ginti mein

ishq hisab chukana chaha tha hum ne

sari umr sama gai ek kaTauti mein

harf-e-zist ko maut ki dimak chaT bhi le

kab se hun mahsur badan ki ghaTi mein