ek ik qadam fareb-e-tamanna se bach ke chal

ik ik qadam fareb-e-tamannā se bach ke chal

duniyā kī aarzū hai to duniyā se bach ke chal

ḳhud DhūñDh legā tujh ko tirā munfarid maqām

rāh-e-talab meñ naqsh-e-kaf-e-pā se bach ke chal

baaqī hai mere dil meñ abhī azmat-e-vajūd

qatre se kah rahā huuñ ki dariyā se bach ke chal

miltī nahīñ hai rāh-e-sukūñ ḳhauf-o-yās meñ

gulshan kī justujū hai to sahrā se bach ke chal

muñh jāda-e-vafā se na moḌ ai vafā-shi.ār

lekin hudūd-e-chashm-e-tamāshā se bach ke chal

kitnī hasīñ haiñ un ke sitam kī masarrateñ

shukr-e-karam kī zahmat-e-be-jā se bach ke chal

lamhe udaas udaas fazā.eñ ghuTī ghuTī

duniyā agar yahī hai to duniyā se bach ke chal

apne adab pe naaz hai tujh ko agar 'shakīl'

maġhrib-zadā adiib kī duniyā se bach ke chal

ek ek qadam fareb-e-tamanna se bach ke chal

duniya ki aarzu hai to duniya se bach ke chal

KHud DhunDh lega tujh ko tera munfarid maqam

rah-e-talab mein naqsh-e-kaf-e-pa se bach ke chal

baqi hai mere dil mein abhi azmat-e-wajud

qatre se kah raha hun ki dariya se bach ke chal

milti nahin hai rah-e-sukun KHauf-o-yas mein

gulshan ki justuju hai to sahra se bach ke chal

munh jada-e-wafa se na moD ai wafa-shiar

lekin hudud-e-chashm-e-tamasha se bach ke chal

kitni hasin hain un ke sitam ki masarraten

shukr-e-karam ki zahmat-e-be-ja se bach ke chal

lamhe udas udas fazaen ghuTi ghuTi

duniya agar yahi hai to duniya se bach ke chal

apne adab pe naz hai tujh ko agar 'shakil'

maghrib-zada adib ki duniya se bach ke chal