zara si der ko hum kya sharafat par utar aae

zarā sī der ko ham kyā sharāfat par utar aa.e

ye buzdil log bhī ham se baġhāvat par utar aa.e

mujhe barbād karne kī rahīñ jab sāzisheñ nākām

mire dushman mujhī se phir mohabbat par utar aa.e

ta'alluq ḳhatm hone meñ abhī kuchh vaqt baaqī hai

maiñ itnā chāhtā huuñ vo shikāyat par utar aa.e

tirī tasvīr bhī hotī to kuchh din kaam chal jaatā

yūñhī thoḌī na ham kāfir 'ibādat par utar aa.e

aziyyat meñ bhī vo dāman isī ḳhātir nahīñ chhoḌā

kabhī shāyad vo ḳhush ho kar 'ināyat par utar aa.e

ziyāda bhī mulāqāteñ nahīñ achchhī kise mā'lūm

mohabbat kab badan kī phir zarūrat par utar aa.e

miyāñ ab shā'irī chhoḌo kamāne kā bhī kuchh socho

kahīñ aisā na ho mahbūb daulat par utar aa.e

zara si der ko hum kya sharafat par utar aae

ye buzdil log bhi hum se baghawat par utar aae

mujhe barbaad karne ki rahin jab sazishen nakaam

mere dushman mujhi se phir mohabbat par utar aae

ta'alluq KHatm hone mein abhi kuchh waqt baqi hai

main itna chahta hun wo shikayat par utar aae

teri taswir bhi hoti to kuchh din kaam chal jata

yunhi thoDi na hum kafir 'ibaadat par utar aae

aziyyat mein bhi wo daman isi KHatir nahin chhoDa

kabhi shayad wo KHush ho kar 'inayat par utar aae

ziyaada bhi mulaqaten nahin achchhi kise ma'lum

mohabbat kab badan ki phir zarurat par utar aae

miyan ab sha'iri chhoDo kamane ka bhi kuchh socho

kahin aisa na ho mahbub daulat par utar aae