is tarah bhi to KHuda hi ki ibaadat ki hai

is tarah bhī to ḳhudā hī kī 'ibādat kī hai

ham ne har daur meñ insāñ se mohabbat kī hai

raushnī bāñTte rahnā hai hamārā sheva

ham ne jalte hue sūraj se rafāqat kī hai

zulfoñ ke saa.e meñ ārām bhalā kyā karte

ham ne sahrā kī tapish meñ bhī riyāzat kī hai

kāñch ke ghar meñ sajā kar hameñ rakkhā us ne

ham ne to sang-e-dar-e-jāñ kī hifāzat kī hai

ham ne ashkoñ se likhā apnī vafā kā qissa

aur ġhazloñ meñ bayāñ dil kī hikāyat kī hai

ġham ke parde meñ jo hañste haiñ samajh sakte haiñ

kis jagah ham se tabassum ne baġhāvat kī hai

shā'irī ne hī diyā naam zamāne meñ hameñ

'ārzū' ham ne suḳhan kī hī himāyat kī hai

is tarah bhi to KHuda hi ki 'ibaadat ki hai

hum ne har daur mein insan se mohabbat ki hai

raushni banTte rahna hai hamara shewa

hum ne jalte hue suraj se rafaqat ki hai

zulfon ke sae mein aaram bhala kya karte

hum ne sahra ki tapish mein bhi riyazat ki hai

kanch ke ghar mein saja kar hamein rakkha us ne

hum ne to sang-e-dar-e-jaan ki hifazat ki hai

hum ne ashkon se likha apni wafa ka qissa

aur ghazlon mein bayan dil ki hikayat ki hai

gham ke parde mein jo hanste hain samajh sakte hain

kis jagah hum se tabassum ne baghawat ki hai

sha'iri ne hi diya nam zamane mein hamein

'arzu' hum ne suKHan ki hi himayat ki hai