huzur-e-yar mein harf iltija ke rakkhe the

huzūr-e-yār meñ harf iltijā ke rakkhe the

charāġh sāmne jaise havā ke rakkhe the

bas ek ashk-e-nadāmat ne saaf kar Daale

vo sab hisāb jo ham ne uThā ke rakkhe the

sumūm-e-vaqt ne lahje ko zaḳhm zaḳhm kiyā

vagarna ham ne qarīne sabā ke rakkhe the

bikhar rahe the so ham ne uThā liye ḳhud hī

gulāb jo tirī ḳhātir sajā ke rakkhe the

havā ke pahle hī jhoñke se haar maan ga.e

vahī charāġh jo ham ne bachā ke rakkhe the

tumhī ne paañv na rakkhā vagarna vasl kī shab

zamīñ pe ham ne sitāre bichhā ke rakkhe the

miTā sakī na unheñ roz o shab kī bārish bhī

diloñ pe naqsh jo rañg-e-hinā ke rakkhe the

husūl-e-manzil-e-duniyā kuchh aisā kaam na thā

magar jo raah meñ patthar anā ke rakkhe the

huzur-e-yar mein harf iltija ke rakkhe the

charagh samne jaise hawa ke rakkhe the

bas ek ashk-e-nadamat ne saf kar Dale

wo sab hisab jo hum ne uTha ke rakkhe the

sumum-e-waqt ne lahje ko zaKHm zaKHm kiya

wagarna hum ne qarine saba ke rakkhe the

bikhar rahe the so hum ne uTha liye KHud hi

gulab jo teri KHatir saja ke rakkhe the

hawa ke pahle hi jhonke se haar man gae

wahi charagh jo hum ne bacha ke rakkhe the

tumhi ne panw na rakkha wagarna wasl ki shab

zamin pe hum ne sitare bichha ke rakkhe the

miTa saki na unhen roz o shab ki barish bhi

dilon pe naqsh jo rang-e-hina ke rakkhe the

husul-e-manzil-e-duniya kuchh aisa kaam na tha

magar jo rah mein patthar ana ke rakkhe the