rakkhi hargiz na tere ruKH ne ruKH-e-badr ki qadr

rakkhī hargiz na tire ruḳh ne ruḳh-e-badr kī qadr

khoī kākul ne bhī āḳhir ko shab-e-qadr kī qadr

izzat-o-qadr kī us gul se tavaqqo.a hai abas

vaañ na izzat kī kuchh izzat hai na kuchh qadr kī qadr

rāstī ḳhvār hai us chashm-e-fusūñ-parvar se

haañ magar manzilat-e-makr hai aur ġhadr kī qadr

mai-parastoñ meñ hai yuuñ sāġhar-o-mīnā kā vaqār

jaise islām meñ ho mohtasib o sadr kī qadr

kafsh-bardārī se us mahr kī chamkā hai 'nazīr'

varna kyā ḳhaak thī is zarra-e-be-qadr kī qadr

rakkhi hargiz na tere ruKH ne ruKH-e-badr ki qadr

khoi kakul ne bhi aaKHir ko shab-e-qadr ki qadr

izzat-o-qadr ki us gul se tawaqqoa hai abas

wan na izzat ki kuchh izzat hai na kuchh qadr ki qadr

rasti KHwar hai us chashm-e-fusun-parwar se

han magar manzilat-e-makr hai aur ghadr ki qadr

mai-paraston mein hai yun saghar-o-mina ka waqar

jaise islam mein ho mohtasib o sadr ki qadr

kafsh-bardari se us mahr ki chamka hai 'nazir'

warna kya KHak thi is zarra-e-be-qadr ki qadr