din ke zamin the magar raat mein Dhalte hue log

din ke zāmin the magar raat meñ Dhalte hue log

maiñ ne dekhe haiñ yahāñ rang badalte hue log

kyā mire haath ke gajre kī lagā.eñ qīmat

gul-faroshoñ meñ khaḌe phuul masalte hue log

dosh kyā deñge havā dete hue pattoñ ko

apnoñ hāthoñ se lagī aag meñ jalte hue log

un kī āñkhoñ meñ likhā hotā hai haa.e ġhurbat

tum ne dekhe haiñ kabhī bhuuk meñ marte hue log

ātish-e-husn kī hiddat kā unheñ kyā mā'lūm

raakh ho jā.eñge ye aag ugalte hue log

āstīñ saañp kī nisbat se ġhalat hai mansūb

saañp hote haiñ yahāñ haath meñ palte hue log

din ke zamin the magar raat mein Dhalte hue log

main ne dekhe hain yahan rang badalte hue log

kya mere hath ke gajre ki lagaen qimat

gul-faroshon mein khaDe phul masalte hue log

dosh kya denge hawa dete hue patton ko

apnon hathon se lagi aag mein jalte hue log

un ki aankhon mein likha hota hai hae ghurbat

tum ne dekhe hain kabhi bhuk mein marte hue log

aatish-e-husn ki hiddat ka unhen kya ma'lum

rakh ho jaenge ye aag ugalte hue log

aastin sanp ki nisbat se ghalat hai mansub

sanp hote hain yahan hath mein palte hue log