hosh kho kar josh mein kuchh is tarah main bah gaya

hosh kho kar josh meñ kuchh is tarah maiñ bah gayā

kyā mujhe kahnā thā us se aur kyā kyā kah gayā

us kī jānib dekh kar āḳhir ye mujh ko kyā huā

ek sach hoñToñ pe mere aate aate rah gayā

jo asāsa zindagī kā us ne joḌā umr bhar

maut kā sailāb jab aayā to sab kuchh bah gayā

zulm kī buniyād par us ne banāyā thā mahal

sabr kī bas ek hī Thokar se vo bhī Dhah gayā

tum ne to aañsū hī dekhe haiñ tumheñ mālūm kyā

dard kā dariyā mirī āñkhoñ se ho kar bah gayā

dostī qaa.em rahe har haal meñ ye soch kar

dostoñ ne jo diye vo zaḳhm hañs kar sah gayā

zindagī ne har qadam par ne.amateñ taqsīm kiiñ

aur 'sāhil' umr ke zer-o-zabar meñ rah gayā

hosh kho kar josh mein kuchh is tarah main bah gaya

kya mujhe kahna tha us se aur kya kya kah gaya

us ki jaanib dekh kar aaKHir ye mujh ko kya hua

ek sach honTon pe mere aate aate rah gaya

jo asasa zindagi ka us ne joDa umr bhar

maut ka sailab jab aaya to sab kuchh bah gaya

zulm ki buniyaad par us ne banaya tha mahal

sabr ki bas ek hi Thokar se wo bhi Dhah gaya

tum ne to aansu hi dekhe hain tumhein malum kya

dard ka dariya meri aankhon se ho kar bah gaya

dosti qaem rahe har haal mein ye soch kar

doston ne jo diye wo zaKHm hans kar sah gaya

zindagi ne har qadam par neamaten taqsim kin

aur 'sahil' umr ke zer-o-zabar mein rah gaya