sajde taDap rahe hain tere aastan se dur

sajde taḌap rahe haiñ tire āstāñ se duur

ye jān-e-dāstāñ bhī haiñ kyuuñ dāstāñ se duur

chal ai dil-e-hazīñ kahīñ ġham ke jahāñ se duur

yā'nī ab is zamīn se us āsmāñ se duur

kī haiñ bigaḌ ke vaqt ne vo barq-pāshiyāñ

rahne lagā ḳhayāl bhī ab āshiyāñ se duur

mānind-e-sabza ho ga.e begāna ahl-e-bāġh

ab gulsitāñ meñ rah ke bhī huuñ gulsitāñ se duur

parvā nahīñ jo merā nasheman jalā de barq

ik aur āshiyāñ bhī hai is āshiyāñ se duur

ai ruuh is ‘azāb-e-musalsal se de najāt

chal ab chaleñ hayāt ke ḳhvāb-e-girāñ se duur

jo baḌh ga.e vo chāñd sitāroñ ke haiñ qarīb

ham naqsh-e-pā the chhūT ga.e kārvāñ se duur

tāroñ ke qāfile haiñ ki sajde 'munīr' ke

raushan haiñ jo charāġh tire āstāñ se duur

sajde taDap rahe hain tere aastan se dur

ye jaan-e-dastan bhi hain kyun dastan se dur

chal ai dil-e-hazin kahin gham ke jahan se dur

ya'ni ab is zamin se us aasman se dur

ki hain bigaD ke waqt ne wo barq-pashiyan

rahne laga KHayal bhi ab aashiyan se dur

manind-e-sabza ho gae begana ahl-e-bagh

ab gulsitan mein rah ke bhi hun gulsitan se dur

parwa nahin jo mera nasheman jala de barq

ek aur aashiyan bhi hai is aashiyan se dur

ai ruh is ‘azab-e-musalsal se de najat

chal ab chalen hayat ke KHwab-e-giran se dur

jo baDh gae wo chand sitaron ke hain qarib

hum naqsh-e-pa the chhuT gae karwan se dur

taron ke qafile hain ki sajde 'munir' ke

raushan hain jo charagh tere aastan se dur