hamari KHair-KHabar bhi KHuda-ra li jae

hamārī ḳhair-ḳhabar bhī ḳhudā-rā lī jaa.e

kisī tarah se azal kī ye be-gharī jaa.e

hamārī barsoñ kī aa.heñ bhī is meñ shāmil hoñ

kisī bhī dasht kī buniyād jab rakhī jaa.e

chahār-samt meñ phaile hue ravāñ dariyā

ab aadmī tujhe vahshat samet pī jaa.e

maiñ tere vasl ke lamhoñ kī gaThḌiyāñ kholūñ

ye kā.ināt mire saath dekhtī jaa.e

maiñ jāntā huuñ ki dil se nikal ke aatī hai

vo ek guuñj jo har samt phailtī jaa.e

tumhāre vāste tā-'umr raushnī bāñTe

kisī charāġh se guft-o-shunīd kī jaa.e

hamari KHair-KHabar bhi KHuda-ra li jae

kisi tarah se azal ki ye be-ghari jae

hamari barson ki aahen bhi is mein shamil hon

kisi bhi dasht ki buniyaad jab rakhi jae

chahaar-samt mein phaile hue rawan dariya

ab aadmi tujhe wahshat samet pi jae

main tere wasl ke lamhon ki gaThDiyan kholun

ye kainat mere sath dekhti jae

main jaanta hun ki dil se nikal ke aati hai

wo ek gunj jo har samt phailti jae

tumhaare waste ta-'umr raushni banTe

kisi charagh se guft-o-shunid ki jae