uThi badli ghaTa chhai ajab mausam hua dil ka

uThī badlī ghaTā chhā.ī 'ajab mausam huā dil kā

kahīñ tar ho na jaa.e phir zarā dāman bachā dil kā

mohabbat kī kitāboñ meñ december bhī hai ab shāmil

sunātī hai hameñ bārish fasāna be-vafā dil kā

sadā se hijr kā mausam rahā hai shahr meñ apne

havā kā har chalan bhī be-sabab dushman rahā dil kā

'ināyat thī unhī kī jo unhoñ ne rābta rakkhā

huā kyā phir ḳhudā jaane ki TuuTā silsila dil kā

mirī qismat kā taarā 'umr bhar gardish kī zad meñ thā

ubharnā thā jahāñ jā kar vahīñ sūraj Dhalā dil kā

huā hai ab ḳhayāl-o-ḳhvāb barg-o-bār kā mausam

ḳhizāoñ ne jalā Daalā hai har pattā harā dil kā

sunahrī dhuup sī āñkhoñ kā Dhalnā Dūbnā dekhā

'azāb-e-dīd thā manzar diyā jis dam bujhā dil kā

kahānī ḳhatm ho jaatī kisī anjām se pahle

batā dete agar jānāñ tumheñ jo haal thā dil kā

zamāne se alag huuñ maiñ to is meñ kyā ḳhatā merī

khaTaktā hai vahī sab ko jo ho sachchā kharā dil kā

mohabbat ke safar meñ ham divāne aise the 'saulat'

jalā diiñ kashtiyāñ saarī chalā jo qāfila dil kā

uThi badli ghaTa chhai 'ajab mausam hua dil ka

kahin tar ho na jae phir zara daman bacha dil ka

mohabbat ki kitabon mein december bhi hai ab shamil

sunati hai hamein barish fasana be-wafa dil ka

sada se hijr ka mausam raha hai shahr mein apne

hawa ka har chalan bhi be-sabab dushman raha dil ka

'inayat thi unhi ki jo unhon ne rabta rakkha

hua kya phir KHuda jaane ki TuTa silsila dil ka

meri qismat ka tara 'umr bhar gardish ki zad mein tha

ubharna tha jahan ja kar wahin suraj Dhala dil ka

hua hai ab KHayal-o-KHwab barg-o-bar ka mausam

KHizaon ne jala Dala hai har patta hara dil ka

sunahri dhup si aankhon ka Dhalna Dubna dekha

'azab-e-did tha manzar diya jis dam bujha dil ka

kahani KHatm ho jati kisi anjam se pahle

bata dete agar jaanan tumhein jo haal tha dil ka

zamane se alag hun main to is mein kya KHata meri

khaTakta hai wahi sab ko jo ho sachcha khara dil ka

mohabbat ke safar mein hum diwane aise the 'saulat'

jala din kashtiyan sari chala jo qafila dil ka