tumhaara aks har ek jaan ubhaarna hai hamein

tumhārā 'aks har ik jaañ ubhārnā hai hameñ

tamām 'umr tumhīñ ko nihārnā hai hameñ

tumhāre saath bahut din guzārne ke liye

tumhārā hijr bahut din guzārnā hai hameñ

ḳhudā kabhī hameñ baḳhshe agar murād koī

tumhārā naam hī rab se pukārnā hai hameñ

kabhī sitāroñ ke ham-rāh aao mere chāñd

tumhāre chehre kā sadqa utārnā hai hameñ

tumhāre chehre pe likhnī haiñ saikḌoñ ġhazleñ

tumhāre husn pe lafzoñ ko vārnā hai hameñ

agar ye tai hai ki tum hī mire muqābil ho

to jītnā hai tumheñ aur hārnā hai hameñ

hamāre paas chale aao mat karo tāḳhīr

tumhāre hukm se ḳhud ko sudhārnā hai hameñ

tumhārā ho ke hī rahnā hai ham ko jān-e-'shāh'

tumhāre saath muqaddar sañvārnā hai hameñ

tumhaara 'aks har ek jaan ubhaarna hai hamein

tamam 'umr tumhin ko nihaarna hai hamein

tumhaare sath bahut din guzarne ke liye

tumhaara hijr bahut din guzarna hai hamein

KHuda kabhi hamein baKHshe agar murad koi

tumhaara nam hi rab se pukarna hai hamein

kabhi sitaron ke ham-rah aao mere chand

tumhaare chehre ka sadqa utarna hai hamein

tumhaare chehre pe likhni hain saikDon ghazlen

tumhaare husn pe lafzon ko warna hai hamein

agar ye tai hai ki tum hi mere muqabil ho

to jitna hai tumhein aur haarna hai hamein

hamare pas chale aao mat karo taKHir

tumhaare hukm se KHud ko sudhaarna hai hamein

tumhaara ho ke hi rahna hai hum ko jaan-e-'shah'

tumhaare sath muqaddar sanwarna hai hamein