teri duri ne mujhe rog laga rakkha hai

terī duurī ne mujhe rog lagā rakkhā hai

chāñd ko ab mirī āñkhoñ ne jalā rakkhā hai

dil ko lagtā hai ki vo aaj bhī aa.egā zarūr

ham ne har shai ko usī tarh sajā rakkhā hai

ham ko mā'lūm thā duniyā kī 'adāvat kā chalan

is liye ham ne tirā naam chhupā rakkhā hai

tū to har haal meñ hī jaan se pyārā niklā

jis ne nafrat kā bhī me'yār baḌhā rakkhā hai

yahī anjām hai is 'ishq kī qurbat kā yahāñ

sang har shaḳhs ne hāthoñ meñ uThā rakkhā hai

shahr meñ aaj bhī vo shaḳhs bahut tanhā hai

jis ne daulat se bahut naam kamā rakkhā hai

ab koī rāh-e-najāt us se nahīñ bantī hai

jis ne duniyā kī mohabbat ko sazā rakkhā hai

aaj tak dil se nahīñ koī du'ā niklī hai

ham ne har baat ko hoñToñ meñ dabā rakkhā hai

chāhe duniyā mujhe dekhe na kabhī achchhe se

maiñ ne har shaḳhs ko siine se lagā rakkhā hai

kaun kahtā hai ki tanhā huuñ maiñ is duniyā meñ

terī yādoñ ne to mela sā sajā rakkhā hai

zarf dekhā hai mirī tishna-labī kā tum ne

maiñ ne sahrā ko bhī āñkhoñ meñ basā rakkhā hai

mauj-e-tūfān se Darnā to muqaddar hai mirā

maiñ ne kashtī ko bhī mañjdhār meñ lā rakkhā hai

jis kī tā'bīr mayassar hī nahīñ hai ham ko

aisā ik ḳhvāb nigāhoñ meñ sajā rakkhā hai

ḳhaak honā hī muqaddar hai to phir Darnā kyā

ham ne 'sāhil' yahī miTTī ko batā rakkhā hai

teri duri ne mujhe rog laga rakkha hai

chand ko ab meri aankhon ne jala rakkha hai

dil ko lagta hai ki wo aaj bhi aaega zarur

hum ne har shai ko usi tarh saja rakkha hai

hum ko ma'lum tha duniya ki 'adawat ka chalan

is liye hum ne tera nam chhupa rakkha hai

tu to har haal mein hi jaan se pyara nikla

jis ne nafrat ka bhi me'yar baDha rakkha hai

yahi anjam hai is 'ishq ki qurbat ka yahan

sang har shaKHs ne hathon mein uTha rakkha hai

shahr mein aaj bhi wo shaKHs bahut tanha hai

jis ne daulat se bahut nam kama rakkha hai

ab koi rah-e-najat us se nahin banti hai

jis ne duniya ki mohabbat ko saza rakkha hai

aaj tak dil se nahin koi du'a nikli hai

hum ne har baat ko honTon mein daba rakkha hai

chahe duniya mujhe dekhe na kabhi achchhe se

main ne har shaKHs ko sine se laga rakkha hai

kaun kahta hai ki tanha hun main is duniya mein

teri yaadon ne to mela sa saja rakkha hai

zarf dekha hai meri tishna-labi ka tum ne

main ne sahra ko bhi aankhon mein basa rakkha hai

mauj-e-tufan se Darna to muqaddar hai mera

main ne kashti ko bhi manjdhaar mein la rakkha hai

jis ki ta'bir mayassar hi nahin hai hum ko

aisa ek KHwab nigahon mein saja rakkha hai

KHak hona hi muqaddar hai to phir Darna kya

hum ne 'sahil' yahi miTTi ko bata rakkha hai