main wo daraKHt hun khata hai jo bhi phal mere

maiñ vo daraḳht huuñ khātā hai jo bhī phal mere

zarūr mujh se ye kahtā hai saath chal mere

ye kā.ināt tasarruf meñ thī rahe jab tak

nazar buland mirī faisle aTal mere

mujhe na dekh mirī baat sun ki mujh se haiñ

kahīñ kahīñ mutasādim bhī kuchh 'amal mere

bachā hī kyā huuñ maiñ āvāz rah gayā huuñ faqat

churā ke rang to sab le ga.ī ġhazal mere

ye tab kī baat hai jab tum se rābta bhī na thā

abhī hue na the ash'ār mubtazal mere

ye ḳhauf mujh ko uḌātā hai vaqt ke mānind

ki baiThne se na ho jaa.eñ paañv shal mere

vo din the aur na jaane vo kaun se din the

tire baġhair guzarte nahīñ the pal mere

kabhī milegā kahīñ shahr-e-ḳhvāb se bāhar

agar nahīñ to ḳhayāloñ se bhī nikal mere

maiñ kis tarah kā huuñ ye tū batā nahīñ saktā

magar ye tai hai ki haiñ yaar be-badal mere

jalā huuñ hijr ke sho'loñ meñ bār-hā ajmal

magar maiñ 'ishq huuñ jaate nahīñ haiñ bal mere

main wo daraKHt hun khata hai jo bhi phal mere

zarur mujh se ye kahta hai sath chal mere

ye kainat tasarruf mein thi rahe jab tak

nazar buland meri faisle aTal mere

mujhe na dekh meri baat sun ki mujh se hain

kahin kahin mutasadim bhi kuchh 'amal mere

bacha hi kya hun main aawaz rah gaya hun faqat

chura ke rang to sab le gai ghazal mere

ye tab ki baat hai jab tum se rabta bhi na tha

abhi hue na the ash'ar mubtazal mere

ye KHauf mujh ko uData hai waqt ke manind

ki baiThne se na ho jaen panw shal mere

wo din the aur na jaane wo kaun se din the

tere baghair guzarte nahin the pal mere

kabhi milega kahin shahr-e-KHwab se bahar

agar nahin to KHayalon se bhi nikal mere

main kis tarah ka hun ye tu bata nahin sakta

magar ye tai hai ki hain yar be-badal mere

jala hun hijr ke sho'lon mein bar-ha ajmal

magar main 'ishq hun jate nahin hain bal mere