hijr ki raat ka anjam to pyara nikla

hijr kī raat kā anjām to pyārā niklā

vahī sūraj ki jo Duubā thā dubāra niklā

zulmat-e-shab se huā din kā tasavvur mumkin

ye añdherā to ujāle kā sahārā niklā

tū ki thā bazm meñ tasvīr kam-āmezī kī

merī tanhā.ī meñ kyuuñ anjuman-ārā niklā

maiñ tire qurb se Dartā huuñ ki tū zinda rahe

maiñ samundar meñ jab utrā to kinārā niklā

vaqt ne jab bhī mire haath se mash'al chhīnī

zehn meñ tere tasavvur kā sitārā niklā

jaane ye karb hai duurī kā ki miTTī kā tilism

sat.h-e-dariyā pe to mahtāb dubārā niklā

apnī hastī ko miTāne kā natīja ye hai

phuul toḌā to mire ḳhuun kā dhārā niklā

nafsī nafsī bhī vahī sach kī duhā.ī bhī vahī

terā mahshar mirā mānūs nazārā niklā

ab to patthar ke zamāne se nikal aao 'nadīm'

ab to sochoñ ke tasādum se sharāra niklā

hijr ki raat ka anjam to pyara nikla

wahi suraj ki jo Duba tha dubara nikla

zulmat-e-shab se hua din ka tasawwur mumkin

ye andhera to ujale ka sahaara nikla

tu ki tha bazm mein taswir kam-amezi ki

meri tanhai mein kyun anjuman-ara nikla

main tere qurb se Darta hun ki tu zinda rahe

main samundar mein jab utra to kinara nikla

waqt ne jab bhi mere hath se mash'al chhini

zehn mein tere tasawwur ka sitara nikla

jaane ye karb hai duri ka ki miTTi ka tilism

sath-e-dariya pe to mahtab dubara nikla

apni hasti ko miTane ka natija ye hai

phul toDa to mere KHun ka dhaara nikla

nafsi nafsi bhi wahi sach ki duhai bhi wahi

tera mahshar mera manus nazara nikla

ab to patthar ke zamane se nikal aao 'nadim'

ab to sochon ke tasadum se sharara nikla