furqat ke dinon mein tum jab hum ko bhula dena

furqat ke dinoñ meñ tum jab ham ko bhulā denā

chehre se pashemānī lāzim hai miTā denā

jazbāt mire rakh lo tum ḳhvāb mire rakh lo

jab ḳhat ko jalānā tum in ko bhī jalā denā

paanī ke safar meñ jab tūfān qarīb aa.e

dariyā ko kahānī tab muusā kī sunā denā

jab kuchh na samajh aa.e hotī hai 'ibādat kyā

tab tishna parindoñ ko paanī hī pilā denā

bachche jo agar pūchheñ hotī hai mohabbat kyā

tab 'mīr' ke un ko tum ash'ār sunā denā

mohtāt haiñ vo kitne 'ummān' zarā dekho

ḳhud aag lagā kar ke kahte haiñ bujhā denā

furqat ke dinon mein tum jab hum ko bhula dena

chehre se pashemani lazim hai miTa dena

jazbaat mere rakh lo tum KHwab mere rakh lo

jab KHat ko jalana tum in ko bhi jala dena

pani ke safar mein jab tufan qarib aae

dariya ko kahani tab musa ki suna dena

jab kuchh na samajh aae hoti hai 'ibaadat kya

tab tishna parindon ko pani hi pila dena

bachche jo agar puchhen hoti hai mohabbat kya

tab 'mir' ke un ko tum ash'ar suna dena

mohtat hain wo kitne 'umman' zara dekho

KHud aag laga kar ke kahte hain bujha dena