dil giraftar-e-bala hijr ki zanjir ka hai

dil giraftār-e-balā hijr kī zanjīr kā hai

ik 'ajab rang tirī zulf-e-girah-gīr kā hai

ek 'ālam pe asar kartī haiñ bāteñ merī

she'r-goī to farīza mirī taqdīr kā hai

shahr-e-idrāk meñ taslīm kiyā jaatā hai

jo hai maqbūl jahāñ meñ vo bayāñ miir kā hai

maiñ ne kal ḳhvāb meñ dekhā thā tumhārā chehrā

mas.ala ḳhvāb nahīñ ḳhvāb kī tā'bīr kā hai

'aql kā kaam hai ye 'aql hī kar saktī hai

marhala sāmne tere tirī tadbīr kā hai

dil kī vāraftagī ummīd dar-e-yār kā ḳhvāb

kyā pata aap ko ye silsila tā'mīr kā hai

vo kahīñ bhī rahe vāpas to yahīñ aa.egā

rahne vaalā vo isī ḳhāna-e-dil-gīr kā hai

aap jis she'r ko sun kar haiñ fasurda 'nūrain'

ranj kis baat kā nauha mirī taqdīr kā hai

dil giraftar-e-bala hijr ki zanjir ka hai

ek 'ajab rang teri zulf-e-girah-gir ka hai

ek 'alam pe asar karti hain baaten meri

she'r-goi to fariza meri taqdir ka hai

shahr-e-idrak mein taslim kiya jata hai

jo hai maqbul jahan mein wo bayan mir ka hai

main ne kal KHwab mein dekha tha tumhaara chehra

masala KHwab nahin KHwab ki ta'bir ka hai

'aql ka kaam hai ye 'aql hi kar sakti hai

marhala samne tere teri tadbir ka hai

dil ki waraftagi ummid dar-e-yar ka KHwab

kya pata aap ko ye silsila ta'mir ka hai

wo kahin bhi rahe wapas to yahin aaega

rahne wala wo isi KHana-e-dil-gir ka hai

aap jis she'r ko sun kar hain fasurda 'nurain'

ranj kis baat ka nauha meri taqdir ka hai