darwaza jo khola to nazar aae khaDe wo

darvāza jo kholā to nazar aa.e khaḌe vo

hairat hai mujhe aaj kidhar bhuul paḌe vo

bhūlā nahīñ dil hijr ke lamhāt kaḌe vo

rāteñ to baḌī thiiñ hī magar din bhī baḌe vo

kyuuñ jaan pe ban aa.ī hai bigḌā hai agar vo

us kī to ye 'ādat ki havāoñ se laḌe vo

alfāz the us ke ki bahāroñ ke payāmāt

ḳhushbū sī barasne lagī yuuñ phuul jhaḌe vo

har shaḳhs tujhe mujh se judā karne kā ḳhvāhāñ

sun paa.e agar ek to das jā ke juḌe vo

bachche kī tarah chāñd ko chhūne kī tamannā

dil ko koī shah de de to kyā kyā na uḌe vo

tūfāñ hai to kyā ġham mujhe āvāz to diije

kyā bhuul gaye aap mire kachche ghaḌe vo

darwaza jo khola to nazar aae khaDe wo

hairat hai mujhe aaj kidhar bhul paDe wo

bhula nahin dil hijr ke lamhat kaDe wo

raaten to baDi thin hi magar din bhi baDe wo

kyun jaan pe ban aai hai bigDa hai agar wo

us ki to ye 'adat ki hawaon se laDe wo

alfaz the us ke ki bahaaron ke payamat

KHushbu si barasne lagi yun phul jhaDe wo

har shaKHs tujhe mujh se juda karne ka KHwahan

sun pae agar ek to das ja ke juDe wo

bachche ki tarah chand ko chhune ki tamanna

dil ko koi shah de de to kya kya na uDe wo

tufan hai to kya gham mujhe aawaz to dije

kya bhul gaye aap mere kachche ghaDe wo