bar-e-digar ghazal ki zamin dekhiye huzur

bār-e-digar ġhazal kī zamīñ dekhiye huzūr

jab jab hamārā qalb-e-hazīñ dekhiye huzūr

un kī nigāh-e-kashf kā jaadū sameTiye

vo bas jidhar dikhā.eñ vahīñ dekhiye huzūr

matlūb hai sukūn-e-dil-e-zār kī jagah

dair-o-haram se haT ke kahīñ dekhiye huzūr

mere tamām ḳhvāb haiñ āñkhoñ meñ munjamid

ḳhālī hatheliyoñ ko nahīñ dekhiye huzūr

kahte the ye makān usī lā-makāñ kā hai

jab ban gayā makāñ to makīñ dekhiye huzūr

'haidar' havas ko 'ishq kī chādar meñ Dhāñp kar

phirtā hai ban ke parda-nashīñ dekhiye huzūr

bar-e-digar ghazal ki zamin dekhiye huzur

jab jab hamara qalb-e-hazin dekhiye huzur

un ki nigah-e-kashf ka jadu sameTiye

wo bas jidhar dikhaen wahin dekhiye huzur

matlub hai sukun-e-dil-e-zar ki jagah

dair-o-haram se haT ke kahin dekhiye huzur

mere tamam KHwab hain aankhon mein munjamid

KHali hatheliyon ko nahin dekhiye huzur

kahte the ye makan usi la-makan ka hai

jab ban gaya makan to makin dekhiye huzur

'haidar' hawas ko 'ishq ki chadar mein Dhanp kar

phirta hai ban ke parda-nashin dekhiye huzur