nazar-nawaz to hain bahr-o-bar hamare liye

nazar-navāz to haiñ bahr-o-bar hamāre liye

vabāl-e-jāñ hī sahī bāl-o-par hamāre liye

kahīñ fazā meñ basāyā hai 'aks-e-nāb kā shahr

kahīñ havā meñ banāyā hai ghar hamāre liye

vo barg-e-tāza nahīñ lauh-e-sabz thī jis par

likhī huī thī na.ī ik ḳhabar hamāre liye

hamārī mauj-e-nigah ne miTā diye varna

hazār naqsh bane ḳhaak par hamāre liye

paḌe hue the ḳhas-o-ḳhār kī tarah lekin

uThā na sang-e-siyah se sharar hamāre liye

koī barastā rahā qahr kī ghaTā ban kar

koī tarastā rahā 'umr bhar hamāre liye

kanār-e-dasht pe dīvār sā khaḌā hai abhī

balā-e-ḳhvāb-e-safar kā ḳhatar hamāre liye

kiyā halāk hameñ dushmanoñ ne raste meñ

saje hue the yahāñ bām-o-dar hamāre liye

ġhazal meñ Tāñkte haiñ vasl-o-hijr ke mazmūñ

ki rah gayā hai yahī ik hunar hamāre liye

nazar-nawaz to hain bahr-o-bar hamare liye

wabaal-e-jaan hi sahi baal-o-par hamare liye

kahin faza mein basaya hai 'aks-e-nab ka shahr

kahin hawa mein banaya hai ghar hamare liye

wo barg-e-taza nahin lauh-e-sabz thi jis par

likhi hui thi nai ek KHabar hamare liye

hamari mauj-e-nigah ne miTa diye warna

hazar naqsh bane KHak par hamare liye

paDe hue the KHas-o-KHar ki tarah lekin

uTha na sang-e-siyah se sharar hamare liye

koi barasta raha qahr ki ghaTa ban kar

koi tarasta raha 'umr bhar hamare liye

kanar-e-dasht pe diwar sa khaDa hai abhi

bala-e-KHwab-e-safar ka KHatar hamare liye

kiya halak hamein dushmanon ne raste mein

saje hue the yahan baam-o-dar hamare liye

ghazal mein Tankte hain wasl-o-hijr ke mazmun

ki rah gaya hai yahi ek hunar hamare liye