yas ka hasrat ka gham ka hai dhuan is shahr mein

yaas kā hasrat kā ġham kā hai dhuāñ is shahr meñ

koī chehra muskurātā hai kahāñ is shahr meñ

khelte haiñ shahr ke nādān bachche aag se

bach nahīñ saktā hai ab koī makāñ is shahr meñ

ham siyah-baḳhtoñ kī duniyā jagmagāne ke liye

kar rahe haiñ log zikr-e-kahkashāñ is shahr meñ

rāz-e-dil kahnā yahāñ hai bā'is-e-tauhīn-e-dil

ham kisī ko kyuuñ banāte rāz-dāñ is shahr meñ

jin ko apnoñ se na begānoñ se koī vāsta

haiñ vahī sach pūchhiye to kāmrāñ is shahr meñ

mujh se rakkheñ rābta 'kāvish' mire ahbāb kyuuñ

maiñ huuñ misl-e-yūsuf-e-be-kārvāñ is shahr meñ

yas ka hasrat ka gham ka hai dhuan is shahr mein

koi chehra muskuraata hai kahan is shahr mein

khelte hain shahr ke nadan bachche aag se

bach nahin sakta hai ab koi makan is shahr mein

hum siyah-baKHton ki duniya jagmagane ke liye

kar rahe hain log zikr-e-kahkashan is shahr mein

raaz-e-dil kahna yahan hai ba'is-e-tauhin-e-dil

hum kisi ko kyun banate raaz-dan is shahr mein

jin ko apnon se na beganon se koi wasta

hain wahi sach puchhiye to kaamran is shahr mein

mujh se rakkhen rabta 'kawish' mere ahbab kyun

main hun misl-e-yusuf-e-be-karwan is shahr mein