phir darichon pe hai bujhti hui saat ka sukut

phir darīchoñ pe hai bujhtī huī sā'at kā sukūt

raat ke jism meñ phailā huā hasrat kā sukūt

ret kī tah meñ ka.ī nīlgūñ dariyā the magar

pī gayā sab ko kisī gum-shuda hairat kā sukūt

duur tak phail gaye zard dhūeñ ke jangal

oḌh kar baiTh ga.ī shāḳh-e-mohabbat kā sukūt

chāñdnī oḌh ke baiThī rahī ik vīrāñ jhiil

lahr ke hoñT pe Thahrā huā vahshat kā sukūt

ik parinda na 'ufuq paar se lauTā barsoñ

ghar ke āñgan meñ utar aayā masāfat kā sukūt

peḌ kī chhāl meñ mahfūz thiiñ kitnī sadiyāñ

paḌh rahī huuñ kisī gum-gashta rivāyat kā sukūt

tīrgī jism ke andar bhī utar aatī hai

jab kahīñ TūTne lagtā hai rafāqat kā sukūt

surḳh phūloñ kī mahak dhuup kī zarrīñ lahreñ

sab pe taarī hai kisī ḳhvāb kī rehlat kā sukūt

apne andar ke samundar se nikal kar dekho

kis qadar gahrā hai be-nām haqīqat kā sukūt

phir darichon pe hai bujhti hui sa'at ka sukut

raat ke jism mein phaila hua hasrat ka sukut

ret ki tah mein kai nilgun dariya the magar

pi gaya sab ko kisi gum-shuda hairat ka sukut

dur tak phail gaye zard dhuen ke jangal

oDh kar baiTh gai shaKH-e-mohabbat ka sukut

chandni oDh ke baiThi rahi ek viran jhil

lahr ke honT pe Thahra hua wahshat ka sukut

ek parinda na 'ufuq par se lauTa barson

ghar ke aangan mein utar aaya masafat ka sukut

peD ki chhaal mein mahfuz thin kitni sadiyan

paDh rahi hun kisi gum-gashta riwayat ka sukut

tirgi jism ke andar bhi utar aati hai

jab kahin TuTne lagta hai rafaqat ka sukut

surKH phulon ki mahak dhup ki zarrin lahren

sab pe tari hai kisi KHwab ki rehlat ka sukut

apne andar ke samundar se nikal kar dekho

kis qadar gahra hai be-nam haqiqat ka sukut