mera kya gham se kuchh rishta lage hai

mirā kyā ġham se kuchh rishta lage hai

kisī kā dard ho apnā lage hai

badaltī tab mujhe duniyā lage hai

dil-e-muztar ko jab jhaTkā lage hai

tirī zulfoñ se ai jān-e-tamannā

ta'alluq raat kā gahrā lage hai

'ajab dastūr hai is gulsitāñ kā

guloñ par bhī yahāñ pahrā lage hai

jo hasrat se take jaatā hai mujh ko

vo koī vaqt kā maarā lage hai

ta'affun hai mire kamre meñ lekin

maiñ 'aadī huuñ mujhe achchhā lage hai

piye jaatā hai insāñ kā lahū tak

ye 'ahd-e-nau bahut pyāsā lage hai

sar-e-gulshan uThe hai ek mahshar

nayā jab bhī koī paudā lage hai

ye kaisā shahr hai ai 'nūr'-e-muztar

yahāñ kā har bashar bahrā lage hai

mera kya gham se kuchh rishta lage hai

kisi ka dard ho apna lage hai

badalti tab mujhe duniya lage hai

dil-e-muztar ko jab jhaTka lage hai

teri zulfon se ai jaan-e-tamanna

ta'alluq raat ka gahra lage hai

'ajab dastur hai is gulsitan ka

gulon par bhi yahan pahra lage hai

jo hasrat se take jata hai mujh ko

wo koi waqt ka mara lage hai

ta'affun hai mere kamre mein lekin

main 'adi hun mujhe achchha lage hai

piye jata hai insan ka lahu tak

ye 'ahd-e-nau bahut pyasa lage hai

sar-e-gulshan uThe hai ek mahshar

naya jab bhi koi pauda lage hai

ye kaisa shahr hai ai 'nur'-e-muztar

yahan ka har bashar bahra lage hai