har ek ruh mein ek gham chhupa lage hai mujhe

har ek ruuh meñ ik ġham chhupā lage hai mujhe

ye zindagī to koī bad-duā lage hai mujhe

pasand-e-ḳhātir-e-ahl-e-vafā hai muddat se

ye dil kā daaġh jo ḳhud bhī bhalā lage hai mujhe

jo āñsuoñ meñ kabhī raat bhiig jaatī hai

bahut qarīb vo āvāz-e-pā lage hai mujhe

maiñ so bhī jā.ūñ to kyā merī band āñkhoñ meñ

tamām raat koī jhāñktā lage hai mujhe

maiñ jab bhī us ke ḳhayāloñ meñ kho sā jaatā huuñ

vo ḳhud bhī baat kare to burā lage hai mujhe

maiñ sochtā thā ki lauTūñgā ajnabī kī tarah

ye merā gaañv to pahchāntā lage hai mujhe

na jaane vaqt kī raftār kyā dikhātī hai

kabhī kabhī to baḌā ḳhauf sā lage hai mujhe

bikhar gayā hai kuchh is tarah aadmī kā vajūd

har ek fard koī sāneha lage hai mujhe

ab ek aadh qadam kā hisāb kyā rakhiye

abhī talak to vahī fāsla lage hai mujhe

hikāyat-e-ġham-e-dil kuchh kashish to rakhtī hai

zamāna ġhaur se suntā huā lage hai mujhe

har ek ruh mein ek gham chhupa lage hai mujhe

ye zindagi to koi bad-dua lage hai mujhe

pasand-e-KHatir-e-ahl-e-wafa hai muddat se

ye dil ka dagh jo KHud bhi bhala lage hai mujhe

jo aansuon mein kabhi raat bhig jati hai

bahut qarib wo aawaz-e-pa lage hai mujhe

main so bhi jaun to kya meri band aankhon mein

tamam raat koi jhankta lage hai mujhe

main jab bhi us ke KHayalon mein kho sa jata hun

wo KHud bhi baat kare to bura lage hai mujhe

main sochta tha ki lauTunga ajnabi ki tarah

ye mera ganw to pahchanta lage hai mujhe

na jaane waqt ki raftar kya dikhati hai

kabhi kabhi to baDa KHauf sa lage hai mujhe

bikhar gaya hai kuchh is tarah aadmi ka wajud

har ek fard koi saneha lage hai mujhe

ab ek aadh qadam ka hisab kya rakhiye

abhi talak to wahi fasla lage hai mujhe

hikayat-e-gham-e-dil kuchh kashish to rakhti hai

zamana ghaur se sunta hua lage hai mujhe