har ek raste ka ham-safar raha hun main

har ek rāste kā ham-safar rahā huuñ maiñ

tamām umr hī āshufta-sar rahā huuñ maiñ

qadam qadam pe vahāñ qurbateñ thiiñ aur yahāñ

hujūm-e-shahr se tanhā guzar rahā huuñ maiñ

pukārā jab mujhe tanhā.ī ne to yaad aayā

ki apne saath bahut muḳhtasar rahā huuñ maiñ

ye kaisī rif.ateñ ā.īna-e-nigāh meñ haiñ

kisī sitāre pe jaise utar rahā huuñ maiñ

maiñ raushnī hī kī vahdāniyat kā qaa.il huuñ

mohabbatoñ hī kā paiġhām-bar rahā huuñ maiñ

maiñ shab-parast nahīñ huuñ yahī ḳhatā hai mirī

adā-shanās-e-jamāl-e-sahar rahā huuñ maiñ

yahāñ bas ek nayā tajraba huā 'fāriġh'

ki lamhe lamhe ko mahsūs kar rahā huuñ maiñ

har ek raste ka ham-safar raha hun main

tamam umr hi aashufta-sar raha hun main

qadam qadam pe wahan qurbaten thin aur yahan

hujum-e-shahr se tanha guzar raha hun main

pukara jab mujhe tanhai ne to yaad aaya

ki apne sath bahut muKHtasar raha hun main

ye kaisi rifaten aaina-e-nigah mein hain

kisi sitare pe jaise utar raha hun main

main raushni hi ki wahdaniyat ka qail hun

mohabbaton hi ka paigham-bar raha hun main

main shab-parast nahin hun yahi KHata hai meri

ada-shanas-e-jamal-e-sahar raha hun main

yahan bas ek naya tajraba hua 'farigh'

ki lamhe lamhe ko mahsus kar raha hun main