har dil jo hai betab to har ek aankh bhari hai

har dil jo hai betāb to har ik aañkh bharī hai

insān pe sach-much koī uftād paḌī hai

rah-rau bhī vahī aur vahī rāhbarī bhī

manzil kā pata hai na kahīñ raah milī hai

muddat se rahī farsh tirī rāhguzar meñ

tab jā ke sitāroñ se kahīñ aañkh laḌī hai

aisā bhī kahīñ dekhā hai mai-ḳhāne kā dastūr

har chashm hai labrez har ik jaam tahī hai

ruḳhsār-e-bahārāñ pe chamaktī huī surḳhī

kahtī hai ki gulshan meñ abhī sub.h huī hai

samjhā hai tū zarre ko faqat zarra-e-nāchīz

chhoTī sī ye duniyā hai jo sūraj se baḌī hai

duniyā meñ koī ahl-e-nazar hī nahīñ baaqī

kotāh-nigāhī hai tirī kam-nazarī hai

mad.hosh fazā mast havā hosh kī mat pūchh

vāraftagi-e-shauq hai ik gum-shudagī hai

kāñToñ pe chale haiñ to kahīñ phuul khile haiñ

phūloñ se mile haiñ to baḌī choT lagī hai

phir soch lo ik baar abhī vaqt hai 'jāved'

shikve meñ kuchh andesha-e-ḳhātir-shikanī hai

har dil jo hai betab to har ek aankh bhari hai

insan pe sach-much koi uftad paDi hai

rah-rau bhi wahi aur wahi rahbari bhi

manzil ka pata hai na kahin rah mili hai

muddat se rahi farsh teri rahguzar mein

tab ja ke sitaron se kahin aankh laDi hai

aisa bhi kahin dekha hai mai-KHane ka dastur

har chashm hai labrez har ek jam tahi hai

ruKHsar-e-bahaaran pe chamakti hui surKHi

kahti hai ki gulshan mein abhi subh hui hai

samjha hai tu zarre ko faqat zarra-e-nachiz

chhoTi si ye duniya hai jo suraj se baDi hai

duniya mein koi ahl-e-nazar hi nahin baqi

kotah-nigahi hai teri kam-nazari hai

madhosh faza mast hawa hosh ki mat puchh

waraftagi-e-shauq hai ek gum-shudagi hai

kanTon pe chale hain to kahin phul khile hain

phulon se mile hain to baDi choT lagi hai

phir soch lo ek bar abhi waqt hai 'jawed'

shikwe mein kuchh andesha-e-KHatir-shikani hai