adna sa ye hairat ka karishma nazar aaya

adnā sā ye hairat kā karishma nazar aayā

jo thā pas-e-parda sar-e-parda nazar aayā

allāh re dīvāngī-e-shauq kā 'ālam

ik raqs meñ har zarra-e-sahrā nazar aayā

uTThe 'ajab andāz se vo josh-e-ġhazab meñ

chaḌhtā huā ik husn kā dariyā nazar aayā

kis darja tirā husn bhī āshob-e-jahāñ hai

jis zarre ko dekhā vo taḌaptā nazar aayā

ab ḳhud tirā jalva jo dikhā de vo dikhā de

ye dīda-e-bīnā to tamāshā nazar aaya

thā lutf-e-junūñ dīda-e-ḳhūnāba-fashāñ se

phūloñ se bharā dāman-e-sahrā nazar aayā

adna sa ye hairat ka karishma nazar aaya

jo tha pas-e-parda sar-e-parda nazar aaya

allah re diwangi-e-shauq ka 'alam

ek raqs mein har zarra-e-sahra nazar aaya

uTThe 'ajab andaz se wo josh-e-ghazab mein

chaDhta hua ek husn ka dariya nazar aaya

kis darja tera husn bhi aashob-e-jahan hai

jis zarre ko dekha wo taDapta nazar aaya

ab KHud tera jalwa jo dikha de wo dikha de

ye dida-e-bina to tamasha nazar aaya

tha lutf-e-junun dida-e-KHunaba-fashan se

phulon se bhara daman-e-sahra nazar aaya