hamare zaKHm mein ThanDak lahu se hoti rahti hai

hamāre zaḳhm meñ ThanDak lahū se hotī rahtī hai

tasallī dil kī taklīf-e-rafū se hotī rahtī hai

zamāna qadr-dāñ hotā hai sūrat aur sīrat kā

guloñ kī qadr jaise rang-o-bū se hotī rahtī hai

nahīñ taklīf se ḳhālī kisī kā phūlnā-phalnā

shajar par sang-bārī chār-sū se hotī rahtī hai

jo maiñ aap aap kahtā huuñ haqārat vo samajhte haiñ

mirī 'izzat-fazā.ī lafz-e-'tū' se hotī rahtī hai

qanā'at kartī rahtī hai jo siipī abr-e-naisāñ par

basar durr-e-'adan kī aabrū se hotī rahtī hai

hai mujh par mehrbānī is qadar taklīf-e-zindāñ kī

ki ḳham gardan mirī tauq-e-gulū se hotī rahtī hai

mayān-e-mai-kadā jab der tak saaqī nahīñ miltā

tashaffī rind kī jām-o-subū se hotī rahtī hai

'ufuq' kī mai-kashī kī hafiz-e-shīrāz kī sūrat

zamāne bhar meñ shohrat lakhna.ū se hotī rahtī hai

hamare zaKHm mein ThanDak lahu se hoti rahti hai

tasalli dil ki taklif-e-rafu se hoti rahti hai

zamana qadr-dan hota hai surat aur sirat ka

gulon ki qadr jaise rang-o-bu se hoti rahti hai

nahin taklif se KHali kisi ka phulna-phalna

shajar par sang-bari chaar-su se hoti rahti hai

jo main aap aap kahta hun haqarat wo samajhte hain

meri 'izzat-fazai lafz-e-'tu' se hoti rahti hai

qana'at karti rahti hai jo sipi abr-e-naisan par

basar durr-e-'adan ki aabru se hoti rahti hai

hai mujh par mehrbani is qadar taklif-e-zindan ki

ki KHam gardan meri tauq-e-gulu se hoti rahti hai

mayan-e-mai-kada jab der tak saqi nahin milta

tashaffi rind ki jam-o-subu se hoti rahti hai

'ufuq' ki mai-kashi ki hafiz-e-shiraaz ki surat

zamane bhar mein shohrat lakhnau se hoti rahti hai