hum na urdu mein na hindi mein ghazal kahte hain

ham na urdu meñ na hindī meñ ġhazal kahte haiñ

ham to bas aap kī bolī meñ ġhazal kahte haiñ

vo amīrī meñ ġhazal kahte haiñ kahte hoñge

sachche shā'ir to faqīrī meñ ġhazal kahte haiñ

aise shā'ir bhī ġharībī ne kiye haiñ paidā

leaderoñ kī jo ġhulāmī meñ ġhazal kahte haiñ

kis ko fursat hai jo ab she'r kahe aur sune

vahī achchhe haiñ jo jaldī meñ ġhazal kahte haiñ

ab na mastī hai na mastī kā sabab bhī koī

phir bhī hairat hai vo mastī meñ ġhazal kahte haiñ

āñkheñ matla' haiñ adhar jin ke haiñ husn-e-matl.a

us javānī ko javānī meñ ġhazal kahte haiñ

vo ġhazal kahte haiñ mā'qūl havā milne par

ek ham haiñ ki jo āñdhī meñ ġhazal kahte haiñ

hum na urdu mein na hindi mein ghazal kahte hain

hum to bas aap ki boli mein ghazal kahte hain

wo amiri mein ghazal kahte hain kahte honge

sachche sha'ir to faqiri mein ghazal kahte hain

aise sha'ir bhi gharibi ne kiye hain paida

leaderon ki jo ghulami mein ghazal kahte hain

kis ko fursat hai jo ab she'r kahe aur sune

wahi achchhe hain jo jaldi mein ghazal kahte hain

ab na masti hai na masti ka sabab bhi koi

phir bhi hairat hai wo masti mein ghazal kahte hain

aankhen matla' hain adhar jin ke hain husn-e-matla

us jawani ko jawani mein ghazal kahte hain

wo ghazal kahte hain ma'qul hawa milne par

ek hum hain ki jo aandhi mein ghazal kahte hain