hai us gul-rang ka diwar hona

hai us gul-rañg kā dīvār honā

ki jaise ḳhvāb se bedār honā

batātī hai mahak dast-e-hinā kī

kisī dar kā pas-e-dīvār honā

use rakhtā hai sahrāoñ meñ hairāñ

dil-e-shā.ir kā pur-asrār honā

kamāl-e-shauq kā hāsil yahī hai

hamārā shahr se be-zār honā

firāq āġhāz hai un sā.atoñ kā

hai āḳhir jin kā vasl-e-yār honā

yahī honā thā āḳhir dasht-e-ġham ko

hamāre haath se gulzār honā

mohabbat kā sabab hai be-niyāzī

kashish us kī hai bas dushvār honā

'munīr' achchhā nahīñ lagtā ye terā

kisī ke hijr meñ bīmār honā

hai us gul-rang ka diwar hona

ki jaise KHwab se bedar hona

batati hai mahak dast-e-hina ki

kisi dar ka pas-e-diwar hona

use rakhta hai sahraon mein hairan

dil-e-shair ka pur-asrar hona

kamal-e-shauq ka hasil yahi hai

hamara shahr se be-zar hona

firaq aaghaz hai un saaton ka

hai aaKHir jin ka wasl-e-yar hona

yahi hona tha aaKHir dasht-e-gham ko

hamare hath se gulzar hona

mohabbat ka sabab hai be-niyazi

kashish us ki hai bas dushwar hona

'munir' achchha nahin lagta ye tera

kisi ke hijr mein bimar hona