manzar wo hadse ka jo palkon mein qaid hai

manzar vo hādse kā jo palkoñ meñ qaid hai

dariyā kisī ke karb kā ashkoñ meñ qaid hai

muddat se maañ ke lab pe tabassum nahīñ koī

paa.e ḳhushī vo kaise jo fikroñ meñ qaid hai

ik din mahak uThegī ye bād-e-sabā magar

phūloñ kī zindagī abhī ġhunchoñ meñ qaid hai

sochā thā us ko ham ne ki raanī banā.eñge

lekin kanīz shaah ke mahloñ meñ qaid hai

'rāvī' shaġhaf nahīñ use ġhazloñ se aaj bhī

paiġhām jab ki 'ishq kā misroñ meñ qaid hai

manzar wo hadse ka jo palkon mein qaid hai

dariya kisi ke karb ka ashkon mein qaid hai

muddat se man ke lab pe tabassum nahin koi

pae KHushi wo kaise jo fikron mein qaid hai

ek din mahak uThegi ye baad-e-saba magar

phulon ki zindagi abhi ghunchon mein qaid hai

socha tha us ko hum ne ki rani banaenge

lekin kaniz shah ke mahlon mein qaid hai

'rawi' shaghaf nahin use ghazlon se aaj bhi

paigham jab ki 'ishq ka misron mein qaid hai