hami bhi na the munkir-e-ghaalib bhi nahin the

haamī bhī na the munkir-e-'ġhālib' bhī nahīñ the

ham ahl-e-tazabzub kisī jānib bhī nahīñ the

is baar bhī duniyā ne hadaf ham ko banāyā

is baar to ham shah ke musāhib bhī nahīñ the

bech aa.e sar-e-qarya-e-zar jauhar-e-pindār

jo daam mile aise munāsib bhī nahīñ the

miTTī kī mohabbat meñ ham āshufta-saroñ ne

vo qarz utāre haiñ ki vājib bhī nahīñ the

lau detī huī raat suḳhan kartā huā din

sab us ke liye jis se muḳhātib bhī nahīñ the

hami bhi na the munkir-e-'ghaalib' bhi nahin the

hum ahl-e-tazabzub kisi jaanib bhi nahin the

is bar bhi duniya ne hadaf hum ko banaya

is bar to hum shah ke musahib bhi nahin the

bech aae sar-e-qarya-e-zar jauhar-e-pindar

jo dam mile aise munasib bhi nahin the

miTTi ki mohabbat mein hum aashufta-saron ne

wo qarz utare hain ki wajib bhi nahin the

lau deti hui raat suKHan karta hua din

sab us ke liye jis se muKHatib bhi nahin the