koi dil de to wo Thukrane ka nain

koī dil de to vo Thukrāne kā na.iiñ

mashvara hai dhoka bhī khāne kā na.iiñ

ye jahāñ tum ko mubārak ho miyāñ

is jahāñ se kaam dīvāne kā na.iiñ

laakh duniyā 'ishq se bezār ho

'āshiqoñ ko phir bhī uktāne kā na.iiñ

tauba kar ke sab gunah miTvā bhī do

naam us kā dil se miTvāne kā na.iiñ

ek titlī ne ye mujh se keh diyā

phuul ke aage ġhazal gaane kā na.iiñ

vasl ho āñkhoñ meñ hī tum Dūbnā

gesuoñ meñ dil ko uljhāne kā na.iiñ

jāgtī āñkhoñ se dekhā thā vo ḳhvāb

dil mujhe dobāra bahkāne kā na.iiñ

apnī ummīdoñ ko girvī rakh diyā

ab ḳhudā-rā mujh ko taḌpāne kā na.iiñ

us kī yādoñ kī zamīñ meñ qabr ho

mere ko miTTī meñ dafnāne kā na.iiñ

zindagī maiñ tujh se vāqif ho gayā

ab maiñ tere jaal meñ aane kā na.iiñ

ḳhuun se āñkheñ mirī ālūd haiñ

zindagī maazī ko duhrāne kā na.iiñ

āḳhrī had tak use chāhūñgā maiñ

'arqam' ab kuchh aur farmāne kā na.iiñ

koi dil de to wo Thukrane ka nain

mashwara hai dhoka bhi khane ka nain

ye jahan tum ko mubarak ho miyan

is jahan se kaam diwane ka nain

lakh duniya 'ishq se bezar ho

'ashiqon ko phir bhi uktane ka nain

tauba kar ke sab gunah miTwa bhi do

nam us ka dil se miTwane ka nain

ek titli ne ye mujh se keh diya

phul ke aage ghazal gane ka nain

wasl ho aankhon mein hi tum Dubna

gesuon mein dil ko uljhane ka nain

jagti aankhon se dekha tha wo KHwab

dil mujhe dobara bahkane ka nain

apni ummidon ko girwi rakh diya

ab KHuda-ra mujh ko taDpane ka nain

us ki yaadon ki zamin mein qabr ho

mere ko miTTi mein dafnane ka nain

zindagi main tujh se waqif ho gaya

ab main tere jal mein aane ka nain

KHun se aankhen meri aalud hain

zindagi mazi ko duhrane ka nain

aaKHri had tak use chahunga main

'arqam' ab kuchh aur farmane ka nain