gulon ko sunna zara tum sadaen bheji hain

guloñ ko sunñā zarā tum sadā.eñ bhejī haiñ

guloñ ke haath bahut sī duā.eñ bhejī haiñ

jo āftāb kabhī bhī ġhurūb hotā nahīñ

hamārā dil hai usī kī shuā.eñ bhejī haiñ

agar jalā.e tumheñ bhī shifā mile shāyad

ik aise dard kī tum ko shuā.eñ bhejī haiñ

tumhārī ḳhushk sī āñkheñ bhalī nahīñ lagtīñ

vo saarī chīzeñ jo tum ko rulā.eñ, bhejī haiñ

siyāh rañg chamaktī huī kanārī hai

pahan lo achchhī lageñgī ghaTā.eñ bhejī haiñ

tumhāre ḳhvāb se har shab lipaT ke sote haiñ

sazā.eñ bhej do ham ne ḳhatā.eñ bhejī haiñ

akelā pattā havā meñ bahut buland uḌā

zamīñ se paañv uThāo havā.eñ bhejī haiñ

gulon ko sunna zara tum sadaen bheji hain

gulon ke hath bahut si duaen bheji hain

jo aaftab kabhi bhi ghurub hota nahin

hamara dil hai usi ki shuaen bheji hain

agar jalae tumhein bhi shifa mile shayad

ek aise dard ki tum ko shuaen bheji hain

tumhaari KHushk si aankhen bhali nahin lagtin

wo sari chizen jo tum ko rulaen, bheji hain

siyah rang chamakti hui kanari hai

pahan lo achchhi lagengi ghaTaen bheji hain

tumhaare KHwab se har shab lipaT ke sote hain

sazaen bhej do hum ne KHataen bheji hain

akela patta hawa mein bahut buland uDa

zamin se panw uThao hawaen bheji hain