gulab tha na kanwal phir badan wo kaisa tha

gulāb thā na kañval phir badan vo kaisā thā

ki jis kā lams bahāroñ meñ rañg bhartā thā

jahāñ pe sāda-dilī ke makīñ the kuchh paikar

vo jhoñpaḌā thā magar pur-shikoh kitnā thā

mashām-e-jāñ se guzartī rahī hai taaza havā

tirā ḳhayāl khule āsamān jaisā thā

usī ke haath meñ tamġhe haiñ kal jo maidāñ meñ

hamārī chhāñv meñ apnā bachāo kartā thā

ye sach hai rañg badaltā thā vo har ik lamha

magar vahī to bahut kāmyāb chehrā thā

har ik nadī se kaḌī pyaas le ke vo guzrā

ye aur baat ki vo ḳhud bhī ek dariyā thā

vo ek jast meñ nazroñ se duur thā 'amabar'

ḳhalā meñ sirf sunahrā ġhubār phailā thā

gulab tha na kanwal phir badan wo kaisa tha

ki jis ka lams bahaaron mein rang bharta tha

jahan pe sada-dili ke makin the kuchh paikar

wo jhonpaDa tha magar pur-shikoh kitna tha

masham-e-jaan se guzarti rahi hai taza hawa

tera KHayal khule aasaman jaisa tha

usi ke hath mein tamghe hain kal jo maidan mein

hamari chhanw mein apna bachao karta tha

ye sach hai rang badalta tha wo har ek lamha

magar wahi to bahut kaamyab chehra tha

har ek nadi se kaDi pyas le ke wo guzra

ye aur baat ki wo KHud bhi ek dariya tha

wo ek jast mein nazron se dur tha 'amabar'

KHala mein sirf sunahra ghubar phaila tha