go jam mera zahr se labrez bahut hai

go jaam mirā zahr se labrez bahut hai

kyā jāniye kyuuñ piine se parhez bahut hai

show-case meñ rakkhā huā aurat kā jo but hai

gūñgā hī sahī phir bhī dil-āvez bahut hai

ash'ār ke phūloñ se ladī shāḳh-e-tamannā

miTTī mire ehsās kī zarḳhez bahut hai

khul jaatā hai tanhā.ī meñ malbūs kī mānind

vo rashk-e-gul-e-tar ki kam-āmez bahut hai

mausam kā taqāza hai ki lazzat kā badan chuum

ḳhvāhish ke daraḳhtoñ meñ havā tez bahut hai

āñkhoñ meñ liye phirtā hai ḳhvāboñ ke jazīre

vo shā.ir-e-āshufta jo shab-ḳhez bahut hai

go jam mera zahr se labrez bahut hai

kya jaaniye kyun pine se parhez bahut hai

show-case mein rakkha hua aurat ka jo but hai

gunga hi sahi phir bhi dil-awez bahut hai

ash'ar ke phulon se ladi shaKH-e-tamanna

miTTi mere ehsas ki zarKHez bahut hai

khul jata hai tanhai mein malbus ki manind

wo rashk-e-gul-e-tar ki kam-amez bahut hai

mausam ka taqaza hai ki lazzat ka badan chum

KHwahish ke daraKHton mein hawa tez bahut hai

aankhon mein liye phirta hai KHwabon ke jazire

wo shair-e-ashufta jo shab-KHez bahut hai