aaj phir un se mulaqat pe rona aaya

aaj phir un se mulāqāt pe ronā aayā

bhūlī-bisrī huī har baat pe ronā aayā

ġhair ke lutf-o-ināyāt pe ronā aayā

aur apnoñ kī shikāyāt pe ronā aayā

aql ne tark-e-ta.alluq ko ġhanīmat jaanā

dil ko badle hue hālāt pe ronā aayā

ahl-e-dil ne kiye ta.amīr haqīqat ke sutūñ

ahl-e-duniyā ko rivāyāt pe ronā aayā

ham na samjhe the ki rusvā.ī-e-ulfat to hai

ai junūñ terī ḳhurāfāt pe ronā aayā

vo bhī din the ki bahut naaz thā apne uupar

aaj ḳhud apnī hī auqāt pe ronā aayā

man.a karte magar is tarah se lāzim bhī na thā

aap ke talḳh javābāt pe ronā aayā

chhoḌiye bhī mirī qismat meñ likhā thā ye bhī

aap ko kyuuñ mire hālāt pe ronā aayā

aaj phir un se mulaqat pe rona aaya

bhuli-bisri hui har baat pe rona aaya

ghair ke lutf-o-inayat pe rona aaya

aur apnon ki shikayat pe rona aaya

aql ne tark-e-talluq ko ghanimat jaana

dil ko badle hue haalat pe rona aaya

ahl-e-dil ne kiye tamir haqiqat ke sutun

ahl-e-duniya ko riwayat pe rona aaya

hum na samjhe the ki ruswai-e-ulfat to hai

ai junun teri KHurafat pe rona aaya

wo bhi din the ki bahut naz tha apne upar

aaj KHud apni hi auqat pe rona aaya

mana karte magar is tarah se lazim bhi na tha

aap ke talKH jawabaat pe rona aaya

chhoDiye bhi meri qismat mein likha tha ye bhi

aap ko kyun mere haalat pe rona aaya