gila kis se karen aghyar-e-dil-azar kitne hain

gila kis se kareñ aġhyār-e-dil-āzār kitne haiñ

hameñ mālūm hai ahbāb bhī ġham-ḳhvār kitne haiñ

sakat baaqī nahīñ hai qum be-iznillāh kahne kī

masīhā bhī hamāre daur ke bīmār kitne haiñ

ye socho kaisī rāhoñ se guzar kar maiñ yahāñ pahuñchā

ye mat dekho mire dāman meñ uljhe ḳhaar kitne haiñ

jo sote haiñ nahīñ kuchh zikr un kā vo to sote haiñ

magar jo jāgte haiñ un meñ bhī bedār kitne haiñ

bahut haiñ mudda.ī sach kī taraf-dārī ke ai 'zāhid'

magar jo jhuuT se haiñ bar-sar-e-paikār kitne haiñ

gila kis se karen aghyar-e-dil-azar kitne hain

hamein malum hai ahbab bhi gham-KHwar kitne hain

sakat baqi nahin hai qum be-iznillah kahne ki

masiha bhi hamare daur ke bimar kitne hain

ye socho kaisi rahon se guzar kar main yahan pahuncha

ye mat dekho mere daman mein uljhe KHar kitne hain

jo sote hain nahin kuchh zikr un ka wo to sote hain

magar jo jagte hain un mein bhi bedar kitne hain

bahut hain muddai sach ki taraf-dari ke ai 'zahid'

magar jo jhuT se hain bar-sar-e-paikar kitne hain