band kamre mein na ghuT jae kahin dam logo

band kamre meñ na ghuT jaa.e kahīñ dam logo

kam se kam koī darīcha hī kahīñ se kholo

koī tahrīk to ubhre koī halchal to ho

koī patthar kisī jānib se idhar bhī pheñko

harf-e-nā-gufta huuñ ik roz mujhe bhī to paḌho

mere saa.e ko mirā khoyā huā chehra do

hādse vaqt ke har moḌ pe haiñ āvāra

is tarah shahr meñ ghar kāñch kā le kar na phiro

jaane kyā hai ki vo jazbāt nahīñ sīnoñ meñ

varna maiñ bhī huuñ vahī aur vahī tum bhī ho

kitne lamhoñ kā ta'affun hai mire andar bhī

mujh ko dekho mire māthe kī lakīroñ ko paḌho

dhuup tanhā.ī kī 'aiman' hai abhī tez bahut

TūTte saa.e meñ yādoñ ke zarā dam le lo

band kamre mein na ghuT jae kahin dam logo

kam se kam koi daricha hi kahin se kholo

koi tahrik to ubhre koi halchal to ho

koi patthar kisi jaanib se idhar bhi phenko

harf-e-na-gufta hun ek roz mujhe bhi to paDho

mere sae ko mera khoya hua chehra do

hadse waqt ke har moD pe hain aawara

is tarah shahr mein ghar kanch ka le kar na phiro

jaane kya hai ki wo jazbaat nahin sinon mein

warna main bhi hun wahi aur wahi tum bhi ho

kitne lamhon ka ta'affun hai mere andar bhi

mujh ko dekho mere mathe ki lakiron ko paDho

dhup tanhai ki 'aiman' hai abhi tez bahut

TuTte sae mein yaadon ke zara dam le lo