ranj hai haalat-e-safar haal-e-qayam ranj hai

rañj hai hālat-e-safar hāl-e-qayām rañj hai

sub.h-ba-sub.h rañj hai shām-ba-shām rañj hai

us kī shamīm-e-zulf kā kaise ho shukriya adā

jab ki shamīm rañj hai jab ki mashām rañj hai

said to kyā ki said-kār ḳhud bhī nahīñ ye jāntā

daana bhī rañj hai yahāñ ya.anī ki daam rañj hai

māni-e-jāvedān-e-jāñ kuchh bhī nahīñ magar ziyāñ

saare kalīm haiñ zubūñ saarā kalām rañj hai

baabā alif mirī numūd rañj hai aap ke ba-qaul

kyā mirā naam bhī hai rañj haañ tirā naam rañj hai

kaasa gadāgarī kā hai nāf-piyāla yaar kā

bhuuk hai vo badan tamām vasl tamām rañj hai

jiit ke koī aa.e tab haar ke koī aa.e tab

jauhar-e-teġh sharm hai aur niyām rañj hai

dil ne paḌhā sabaq tamām buud to hai qalaq tamām

haañ mirā naam rañj hai haañ tirā naam rañj hai

paik-e-qazā hai dam-ba-dam 'jaun' qadam qadam shumār

laġhzish-e-gām rañj hai husn-e-ḳhirām rañj hai

baabā alif ne shab kahā nashsha-ba-nashsha kar gile

jur.a-ba-jur.a rañj hai jām-ba-jām rañj hai

aan pe ho madār kyā buud ke rozgār kā

dam hama-dam hai duuñ ye dam vahm-e-davām rañj hai

razm hai ḳhuun kā hazar koī bahā.e yā bahe

rustam o zaal haiñ malāl ya.anī ki saam rañj hai

ranj hai haalat-e-safar haal-e-qayam ranj hai

subh-ba-subh ranj hai sham-ba-sham ranj hai

us ki shamim-e-zulf ka kaise ho shukriya ada

jab ki shamim ranj hai jab ki masham ranj hai

said to kya ki said-kar KHud bhi nahin ye jaanta

dana bhi ranj hai yahan yani ki dam ranj hai

mani-e-jawedan-e-jaan kuchh bhi nahin magar ziyan

sare kalim hain zubun sara kalam ranj hai

baba alif meri numud ranj hai aap ke ba-qaul

kya mera nam bhi hai ranj han tera nam ranj hai

kasa gadagari ka hai naf-piyala yar ka

bhuk hai wo badan tamam wasl tamam ranj hai

jit ke koi aae tab haar ke koi aae tab

jauhar-e-tegh sharm hai aur niyam ranj hai

dil ne paDha sabaq tamam bud to hai qalaq tamam

han mera nam ranj hai han tera nam ranj hai

paik-e-qaza hai dam-ba-dam 'jaun' qadam qadam shumar

laghzish-e-gam ranj hai husn-e-KHiram ranj hai

baba alif ne shab kaha nashsha-ba-nashsha kar gile

jura-ba-jura ranj hai jam-ba-jam ranj hai

aan pe ho madar kya bud ke rozgar ka

dam hama-dam hai dun ye dam wahm-e-dawam ranj hai

razm hai KHun ka hazar koi bahae ya bahe

rustam o zal hain malal yani ki sam ranj hai