qadam qadam pe nae imtihan mein aaya

qadam qadam pe na.e imtihān meñ aayā

magar kahāñ maiñ musalsal thakān meñ aayā

zamīñ bhī āsmāñ us ko dikhā.ī dene lagī

parinda jab kabhī ūñchī uḌaan meñ aayā

na chhoḌ haath se 'azm-o-yaqīn kā tesha

shigāf dekh kahāñ tak chaTān meñ aayā

ġhamoñ kī dhuup meñ barsoñ jalā huuñ tab jā kar

maiñ gesuoñ ke hasīñ sā.ebān meñ aayā

gaye dinoñ kī talāfī vo chāhtā thā magar

nikal ke tiir na vāpas kamān meñ aayā

gayā hai jab se nikal kar vo ḳhāna-e-dil se

na koī dūsrā rahne makān meñ aayā

salām karte haiñ jhuk kar ye hādse mujh ko

maiñ jab se apne ḳhudā kī amaan meñ aayā

kuchh itne tez the jhoñke havā ke ai 'muztar'

ġhubār uḌtā huā martabān meñ aayā

qadam qadam pe nae imtihan mein aaya

magar kahan main musalsal thakan mein aaya

zamin bhi aasman us ko dikhai dene lagi

parinda jab kabhi unchi uDan mein aaya

na chhoD hath se 'azm-o-yaqin ka tesha

shigaf dekh kahan tak chaTan mein aaya

ghamon ki dhup mein barson jala hun tab ja kar

main gesuon ke hasin saeban mein aaya

gaye dinon ki talafi wo chahta tha magar

nikal ke tir na wapas kaman mein aaya

gaya hai jab se nikal kar wo KHana-e-dil se

na koi dusra rahne makan mein aaya

salam karte hain jhuk kar ye hadse mujh ko

main jab se apne KHuda ki aman mein aaya

kuchh itne tez the jhonke hawa ke ai 'muztar'

ghubar uDta hua martaban mein aaya