mohabbat ho agar sachchi to daman nam nahin hota

mohabbat ho agar sachchī to dāman nam nahīñ hotā

ki aañsū ḳhushk ho jaa.eñ pa tūfāñ kam nahīñ hotā

ġham-e-daurāñ se dard-e-'ishq to kuchh kam nahīñ hotā

baḌhā soz-e-darūñ go ġham ba-zāhir ġham nahīñ hotā

firāq-o-hijr meñ ghuT ghuT ke mar jaanā hī behtar hai

sar-e-bāzār ham se jor kā mātam nahīñ hotā

muqābil un ke jā kar dil kī ye hālat huī hamdam

qarār aayā magar dard-e-darūñ to kam nahīñ hotā

tirī ulfat meñ ālām-e-jahāñ bhī ho gaye āsāñ

mohabbat meñ kabhī jaur-o-jafā kā ġham nahīñ hotā

tasavvur meñ vo aa kar iztirāb-e-dil baḌhāte haiñ

ki dīdār un kā hotā hai magar paiham nahīñ hotā

ḳhushā ye be-ḳhudī ye be-kalī hai iztirāb-e-dil

ki mere āñsuoñ se un kā dāman nam nahīñ hotā

kisī kī ab ḳhushī se bhī ḳhushī hāsil nahīñ hotī

ki hañs letā huuñ sab ke saath dil ḳhurram nahīñ hotā

'matīn' ab hāl-e-dil apnā karo us shoḳh par zāhir

takallum 'āshiq-e-dil-gīr kā paiham nahīñ hotā

mohabbat ho agar sachchi to daman nam nahin hota

ki aansu KHushk ho jaen pa tufan kam nahin hota

gham-e-dauran se dard-e-'ishq to kuchh kam nahin hota

baDha soz-e-darun go gham ba-zahir gham nahin hota

firaq-o-hijr mein ghuT ghuT ke mar jaana hi behtar hai

sar-e-bazar hum se jor ka matam nahin hota

muqabil un ke ja kar dil ki ye haalat hui hamdam

qarar aaya magar dard-e-darun to kam nahin hota

teri ulfat mein aalam-e-jahan bhi ho gaye aasan

mohabbat mein kabhi jaur-o-jafa ka gham nahin hota

tasawwur mein wo aa kar iztirab-e-dil baDhate hain

ki didar un ka hota hai magar paiham nahin hota

KHusha ye be-KHudi ye be-kali hai iztirab-e-dil

ki mere aansuon se un ka daman nam nahin hota

kisi ki ab KHushi se bhi KHushi hasil nahin hoti

ki hans leta hun sab ke sath dil KHurram nahin hota

'matin' ab haal-e-dil apna karo us shoKH par zahir

takallum 'ashiq-e-dil-gir ka paiham nahin hota