kahin par phul khilte hain kamal-e-abyari hai

kahīñ par phuul khilte haiñ kamāl-e-ābyārī hai

kahīñ par bāñjh hai ḳhitta 'ajab dil kī kiyārī hai

lagā rakkhā hai siine meñ jo ik naḳhl-e-ġham-e-jānāñ

usī ke saa.e meñ ham ne rah-e-hastī guzārī hai

sitāre aañkh se nikleñ to ban jaate haiñ jugnū se

nigār-e-ātish-e-dil se hī jag-mag duniyā saarī hai

ghaTā.eñ jhūmtī hoñ yā havā.eñ raqs kartī hoñ

qafas vāloñ kī qismat meñ vahī ik girya-zārī hai

qafas meñ bhī sabā se pūchhte haiñ haal gulshan kā

vafā kī ye rivāyat qaid meñ bhī ham ko pyārī hai

misāl-e-rang-o-bū ghultī hī jaatī huuñ havāoñ meñ

naved-e-vasl aa.ī hai ki mausam kī ḳhumārī hai

fazā meñ nik.hat-e-gul hai falak par chāñd hai raushan

savād-e-hijr meñ bhī ik tamāshā-e-bahārī hai

ye miTTī sabz hai 'saulat' tumhārī chashm-e-giryāñ se

ki ġham kī ḳhaak meñ bhī zindagī kī ābyārī hai

kahin par phul khilte hain kamal-e-abyari hai

kahin par banjh hai KHitta 'ajab dil ki kiyari hai

laga rakkha hai sine mein jo ek naKHl-e-gham-e-jaanan

usi ke sae mein hum ne rah-e-hasti guzari hai

sitare aankh se niklen to ban jate hain jugnu se

nigar-e-atish-e-dil se hi jag-mag duniya sari hai

ghaTaen jhumti hon ya hawaen raqs karti hon

qafas walon ki qismat mein wahi ek girya-zari hai

qafas mein bhi saba se puchhte hain haal gulshan ka

wafa ki ye riwayat qaid mein bhi hum ko pyari hai

misal-e-rang-o-bu ghulti hi jati hun hawaon mein

nawed-e-wasl aai hai ki mausam ki KHumari hai

faza mein nikhat-e-gul hai falak par chand hai raushan

sawad-e-hijr mein bhi ek tamasha-e-bahaari hai

ye miTTi sabz hai 'saulat' tumhaari chashm-e-giryan se

ki gham ki KHak mein bhi zindagi ki aabyari hai