is matlabi jahan mein apna nahin mila

is matlabī jahān meñ apnā nahīñ milā

ġham to mile ġhamoñ kā mudāvā nahīñ milā

jānib se terī koī ishāra nahīñ milā

so zindagī ko koī sahārā nahīñ milā

tanhā.iyoñ kā dasht thā kuchh itnā ḳhaufnāk

apne vujūd kā mujhe saaya nahīñ milā

itnī tavīl ho ga.ī ye zindagī kī raah

phir lauTne kā koī bhī rasta nahīñ milā

logoñ kā ik hujūm thā matlab ke vāste

chāhe jo dil se ek bhī aisā nahīñ milā

dāman bharā thā ḳhushiyoñ se donoñ jahān kī

ham ko bas ek saath tumhārā nahīñ milā

'almās' shā'irī to bahut kī ga.ī magar

lekin kisī ko 'mīr' sā rutba nahīñ milā

is matlabi jahan mein apna nahin mila

gham to mile ghamon ka mudawa nahin mila

jaanib se teri koi ishaara nahin mila

so zindagi ko koi sahaara nahin mila

tanhaiyon ka dasht tha kuchh itna KHaufnak

apne wujud ka mujhe saya nahin mila

itni tawil ho gai ye zindagi ki rah

phir lauTne ka koi bhi rasta nahin mila

logon ka ek hujum tha matlab ke waste

chahe jo dil se ek bhi aisa nahin mila

daman bhara tha KHushiyon se donon jahan ki

hum ko bas ek sath tumhaara nahin mila

'almas' sha'iri to bahut ki gai magar

lekin kisi ko 'mir' sa rutba nahin mila