bichhaDne wale ka kyunkar na gham kiya jae

bichhaḌne vaale kā kyūñkar na ġham kiyā jaa.e

ye bojh aisā nahīñ hai ki kam kiyā jaa.e

ab intizār kareñ kyā kisī mūarriḳh kā

chalo ye vāqi.a ḳhud hī raqam kiyā jaa.e

maiñ ek baar nahīñ baar baar hañstā huuñ

kisī tarah to udāsī ko kam kiyā jaa.e

koī sabīl nahīñ pyaas ko bujhāne kī

sivā.e is ke ki āñkhoñ ko nam kiyā jaa.e

ye ḳhud se milne milāne kī ek sūrat hai

ki rābta zarā duniyā se kam kiyā jaa.e

vo aur hoñge jo insāf chāhte haiñ tirā

gunāhgār huuñ mujh par karam kiyā jaa.e

bichhaDne wale ka kyunkar na gham kiya jae

ye bojh aisa nahin hai ki kam kiya jae

ab intizar karen kya kisi muarriKH ka

chalo ye waqia KHud hi raqam kiya jae

main ek bar nahin bar bar hansta hun

kisi tarah to udasi ko kam kiya jae

koi sabil nahin pyas ko bujhane ki

siwae is ke ki aankhon ko nam kiya jae

ye KHud se milne milane ki ek surat hai

ki rabta zara duniya se kam kiya jae

wo aur honge jo insaf chahte hain tera

gunahgar hun mujh par karam kiya jae