aankhon se meri kaun mere KHwab le gaya

āñkhoñ se merī kaun mire ḳhvāb le gayā

chashm-e-sadaf se gauhar-e-nāyāb le gayā

tūfān-e-abr-o-bād meñ sab giit kho gaye

jhoñkā havā kā haath se mizrāb le gayā

kuchh nā-ḳhudā ke faiz se sāhil bhī duur thā

kuchh qismatoñ ke pher meñ girdāb le gayā

us shahr-e-ḳhush-jamāl ko kis kī lagī hai aah

kis ġham-zada kā girya-e-ḳhūnāb le gayā

vaañ shahr Duub Duub gaye aur idhar ye bahs

ḳhum le gayā hai yā ḳham-e-mehrāb le gayā

kuchh khoī khoī āñkheñ bhī maujoñ ke saath thiiñ

shāyad unheñ bahā ke koī ḳhvāb le gayā

ġhairoñ kī dushmanī ne na maarā magar hameñ

apnoñ ke iltifāt kā zahrāb le gayā

ai aañkh ab to ḳhvāb kī duniyā se lauT aa

mizhgāñ to khol shahr ko sailāb le gayā

aankhon se meri kaun mere KHwab le gaya

chashm-e-sadaf se gauhar-e-nayab le gaya

tufan-e-abr-o-baad mein sab git kho gaye

jhonka hawa ka hath se mizrab le gaya

kuchh na-KHuda ke faiz se sahil bhi dur tha

kuchh qismaton ke pher mein girdab le gaya

us shahr-e-KHush-jamal ko kis ki lagi hai aah

kis gham-zada ka girya-e-KHunab le gaya

wan shahr Dub Dub gaye aur idhar ye bahs

KHum le gaya hai ya KHam-e-mehrab le gaya

kuchh khoi khoi aankhen bhi maujon ke sath thin

shayad unhen baha ke koi KHwab le gaya

ghairon ki dushmani ne na mara magar hamein

apnon ke iltifat ka zahrab le gaya

ai aankh ab to KHwab ki duniya se lauT aa

mizhgan to khol shahr ko sailab le gaya