gham se bikhra na paemal hua

ġham se bikhrā na pā.emāl huā

maiñ to ġham se hī be-misāl huā

vaqt guzrā to mauja-e-gul thā

vaqt Thahrā to māh-o-sāl huā

ham ga.e jis shajar ke saa.e meñ

us ke girne kā ehtimāl huā

bas ki vahshat thī kār-e-duniyā se

kuchh bhī hāsil na hasb-e-hāl huā

sun ke īrān ke na.e qisse

kuchh ajab sūfiyoñ kā haal huā

jaane zindāñ meñ kyā kahā us ne

jis kā kal raat intiqāl huā

kis liye zulm hai ravā is dam

jis ne pūchhā vo pā.emāl huā

jis ta.alluq pe faḳhr thā mujh ko

vo ta.alluq bhī ik vabāl huā

ai 'hasan' neza-e-rafīqāñ se

sar bachānā bhī ik kamāl huā

gham se bikhra na paemal hua

main to gham se hi be-misal hua

waqt guzra to mauja-e-gul tha

waqt Thahra to mah-o-sal hua

hum gae jis shajar ke sae mein

us ke girne ka ehtimal hua

bas ki wahshat thi kar-e-duniya se

kuchh bhi hasil na hasb-e-haal hua

sun ke iran ke nae qisse

kuchh ajab sufiyon ka haal hua

jaane zindan mein kya kaha us ne

jis ka kal raat intiqal hua

kis liye zulm hai rawa is dam

jis ne puchha wo paemal hua

jis talluq pe faKHr tha mujh ko

wo talluq bhi ek wabaal hua

ai 'hasan' neza-e-rafiqan se

sar bachana bhi ek kamal hua