gham khane mein buda dil-e-nakaam bahut hai

ġham khāne meñ buudā dil-e-nākām bahut hai

ye rañj ki kam hai mai-e-gulfām bahut hai

kahte hue saaqī se hayā aatī hai varna

hai yuuñ ki mujhe durd-e-tah-e-jām bahut hai

ne tiir kamāñ meñ hai na sayyād kamīñ meñ

goshe meñ qafas ke mujhe ārām bahut hai

kyā zohd ko mānūñ ki na ho garche riyā.ī

pādāsh-e-amal kī tama-e-ḳhām bahut hai

haiñ ahl-e-ḳhirad kis ravish-e-ḳhās pe nāzāñ

pābastagi-e-rasm-o-rāh-e-ām bahut hai

zamzam hī pe chhoḌo mujhe kyā tauf-e-haram se

ālūdā-ba-mai jāma-e-ehrām bahut hai

hai qahr gar ab bhī na bane baat ki un ko

inkār nahīñ aur mujhe ibrām bahut hai

ḳhuuñ ho ke jigar aañkh se Tapkā nahīñ ai marg

rahne de mujhe yaañ ki abhī kaam bahut hai

hogā koī aisā bhī ki 'ġhālib' ko na jaane

shā.ir to vo achchhā hai pa badnām bahut hai

gham khane mein buda dil-e-nakaam bahut hai

ye ranj ki kam hai mai-e-gulfam bahut hai

kahte hue saqi se haya aati hai warna

hai yun ki mujhe durd-e-tah-e-jam bahut hai

ne tir kaman mein hai na sayyaad kamin mein

goshe mein qafas ke mujhe aaram bahut hai

kya zohd ko manun ki na ho garche riyai

padash-e-amal ki tama-e-KHam bahut hai

hain ahl-e-KHirad kis rawish-e-KHas pe nazan

pabastagi-e-rasm-o-rah-e-am bahut hai

zamzam hi pe chhoDo mujhe kya tauf-e-haram se

aaluda-ba-mai jama-e-ehram bahut hai

hai qahr gar ab bhi na bane baat ki un ko

inkar nahin aur mujhe ibram bahut hai

KHun ho ke jigar aankh se Tapka nahin ai marg

rahne de mujhe yan ki abhi kaam bahut hai

hoga koi aisa bhi ki 'ghaalib' ko na jaane

shair to wo achchha hai pa badnam bahut hai